Tag Archives: 唐英年

唐英年，你令我十分憤怒！ 當年你身為政府第二把交椅，非法僭建瞞編政府，係你自己有份的政府。身有屎仲敢參選，大話講完一個又一個，到被傳媒追查到不可再瞞時，才出來認錯。你把香港人都當白痴嗎，還是想測試香港人的底線，想知道香港人能有多憤怒！你還敢繼續參選，雖然這只係一個小圈子選舉，中央喜歡便可以。但不得民心，天怒人怨，我睇中央是否和你一樣大膽，繼續撐你做特首！

唐英年昨日主動向記者批評市區重建局的項目「華而不實，貴到無倫」，這不單是批評市建局，應是自我批評。市建局只係執行機構，政策制定及項目審批都在政府手上。而財政司司長係市建局直屬上司。唐英年由2003年到2007年擔任財政司司長，多個項目都係他親手批准的。其中最受坊間爭議的有灣仔Queen’s Cube，實用率六成多、呎價逾1.5萬元，這都是唐英年批出，當老闆的制定，做下屬的只係照做，項目出事後老闆走人不撐下屬，還發炮打擊。這種老闆誰還會為他辦事，有彩就自己，出事就下屬，心寒呀。

明報報道，民主黨中常委羅致光向社福機構高層寫電郵，指名道姓如不提名北京屬意的候選人唐英年，將來對個人及組織都會帶來很多不方便。選舉理應係公平公開，雖然這種小圈子選舉大家也不會認真對待，但白紙黑字寫明要「北京屬意的候選人」，以及有「很多不方便」的後果，真係好離譜！這種干預，由大家心中有數，到現在明目張膽，最怕的是人民以習慣了，不當一回事。溫水煮蛙，不見血但恐怖。

區議會選舉種票疑雲未解，案件還在調查中，政府沒有拿出一套清查現有選民名冊的方法。明天便是特首選委的選舉，小圈子選舉。1200名選委，當中好多界別已經自動當選；參選的也只係圈子中人，誰當選也不影響大局。最終是7百多萬香港人無份投票。 梁振英、唐英年繼續做戲，每日落區爭取民意，人民無份投票，不但反對，就算我支持你都投吾到。 香港選特首和無線選視帝視后一樣，全香港在談論心水，支持誰反對誰。但實情係大家都無份選，無線視帝視后只係一間公司的內部遊戲，而特首選舉就係阿爺一個玩的，1200人陪玩。 兩件事情同一道理：你認真就輸了。

梁振英由低民望變高民望，唐英年剛好相反。原因為何？ 口才好重要，梁振英講得頭頭是道，文章寫一大堆，演講具感染力。而唐英年一句完整的說話也講不清，演講不是得罪人，就係笑柄（360係經典之作）。 朋友好重要，唐英年的朋友由「腳頭好」、「神的感召」到「課外活動」各種嚇人的說法都講得出，就係講吾出他多年的政績。而梁振英的朋友就少說話，就算講都只話支持他的理念。 女人好重要，唐英年拖延多日都講吾清楚「感情缺失」係點解，有幾多女人和他有「課外活動」，對在傳媒中出現的女人也不公平，沒有男人應負的責任。有關梁振英的新聞傳出，他立即出來澄清，而且任傳媒提問。 女人好重要，唐英年的老婆被問時，以「不是朋友」回答，傳聞中的女仕就左閃右避。而梁振英的老婆就大方和老公接受訪問，傳聞中的女仕更主動係電台接受訪問。 物以類聚，梁振英和唐英年本人如何，我這蟻民點會知。但睇他們身邊的人如何，或可作參考。 絕大部份的香港人無權投票，只可以等睇戲。但誰是主角，誰是配角，現在可能還未定。導演（當然係北京啦，你吾會以為係1200名選委呀）在睇兩位男演員的民望，就算「選特首」係一場戲，都要做得好好睇睇，又點會找一個票房毒藥來演呢？ 吾好以為我支持梁振英而反唐英年。我只係睇戲的，不但無權投票，連退票離場也冇得我選。

梁振英第一個辭職，唐英年拖延多時，終於也辭職了。但需要北京同意的唐，反而比只需特首同意的梁更早離任，是有心留難他吧。 因為宣佈參選便要受相關法律規管，所以梁振英創出「備選」一詞，從他的言行，由寫文章，到會見各界人士，根本係準備參選，在做熱身。 唐英年辭職話要好好考慮，但一直不明確示意，只和權貴會面，不和民間人士會面。雖然平民百姓沒票，但唐本來民意已經低下，還不在意提高民望，讓人感覺坐等黃袍加身。 香港回歸14年，應該早就有普選，等了又等，現在出現「有人辭職，冇人參選」的怪現象。幾時，香港才可以正正常常的來一場選舉。 香港，兩個人辭職，一個「備選」，一個「感情缺失」，冇人參選。 何俊仁、馮檢基都話參選特首。不過小朋友玩「猜皇帝」都吾會以為自己真係可以做到皇帝。佢兩個，鐘意去陪跑，俾佢哋去玩吓啦。

梁振英近年越打越勇，個個吾睇好，但無放棄繼續做，民望真係逐步升，最終會否守得雲開見月明就吾知，第一個辭職，先聲奪人，頭彩就有。行政長官「原則上同意」但又吾講生效日期，一個拖字，就係吾俾你走。咁梁振英現在又吾可以話正式參選，半辭職狀態，被玩死。 唐英年坐定定，氣定神閒，等黃袍加身。但對家越來越勇，再吾出贏得大位都無咗個勢。睇吓撐佢尐啦啦隊，由腳頭好，講到神，都講吾出一件政績。真係一事無成。 梁振英無係政府做實務，冇政績好正常。民望由八萬五谷底逐步爬升。唐英年為官多年一事無成，民望吾見得有幾好，唯一只係話「受公務員支持」。十幾萬公務員，我吾知有幾多人支持佢，有做過調查？起碼我就吾支持。 邊個做下任行政長官都冇所謂，都吾關7百幾萬香港人事。 吾好以為有1200個香港人投票，其實只有1票，係北京。